Arooz is now on the App Store, for iPhone and iPad. Download →

All poetry

اثر کرے نہ کرے ، سن تو لے مری فریاد

Allama Iqbal (1877–1938)

اثر کرے نہ کرے ، سن تو لے مری فریاد

نہیں ہے داد کا طالب یہ بندہء آزاد

یہ مشت خاک ، یہ صرصر ، یہ وسعت افلاک

!کرم ہے یا کہ ستم تیری لذت ایجاد

ٹھہر سکا نہ ہوائے چمن میں خیمہء گل

یہی ہے فصل بہاری ، یہی ہے باد مراد؟

قصور وار ، غریب الدیار ہوں لیکن

ترا خرابہ فرشتے نہ کر سکے آباد

مری جفا طلبی کو دعائیں دیتا ہے

وہ دشت سادہ ، وہ تیرا جہان بے بنیاد

خطر پسند طبیعت کو ساز گار نہیں

وہ گلستاں کہ جہاں گھات میں نہ ہو صیاد

مقام شوق ترے قدسیوں کے بس کا نہیں

انھی کا کام ہے یہ جن کے حوصلے ہیں زیاد