یہ بے دلی ہے تو کشتی سے یار کیا اتریں

یہ بے دلی ہے تو کشتی سے یار کیا اتریں

ادھر بھی کون ہے دریا کے پار کیا اتریں

تمام دولت جاں ہار دی محبت میں

جو زندگی سے لیے تھے ادھار کیا اتریں

ہزار جام سے ٹکرا کے جام خالی ہوں

جو آ گئے ہیں دلوں میں غبار کیا اتریں

بسان خاک سر کوئے یار بیٹھے ہیں

اب اس مقام سے ہم خاکسار کیا اتریں

نہ عطر و عود نہ جام و سبو نہ ساز و سرور

فقیر شہر کے گھر شہریار کیا اتریں

ہمیں مجال نہیں ہے کہ بام تک پہنچیں

انہیں یہ عار سر رہ گزار کیا اتریں

جو زخم داغ بنے ہیں وہ بھر گئے تھے فرازؔ

جو داغ زخم بنے ہیں وہ یار کیا اتریں

ye be dili hai to kashti se yar kya utren

idhar bhi kaun hai dariya ke par kya utren

tamam daulat jan har di mohabbat mein

jo zindagi se liye the udhar kya utren

hazar jam se takra ke jam khali hun

jo a gae hain dilon mein ghubar kya utren

basan-e-khak sar-e-ku-e-yar baithe hain

ab us maqam se ham khaksar kya utren

na itr-o-ud na jam-o-subu na saz-o-surur

faqir-e-shahr ke ghar shahryar kya utren

hamen majal nahin hai ke bam tak pahunchen

unhen ye ar sar-e-rah guzar kya utren

jo zakhm dagh bane hain wo bhar gae the faraz

jo dagh-e-zakhm bane hain wo yar kya utren