ہر تماشائی فقط ساحل سے منظر دیکھتا

ہر تماشائی فقط ساحل سے منظر دیکھتا

کون دریا کو الٹتا کون گوہر دیکھتا

وہ تو دنیا کو مری دیوانگی خوش آ گئی

تیرے ہاتھوں میں وگرنہ پہلا پتھر دیکھتا

آنکھ میں آنسو جڑے تھے پر صدا تجھ کو نہ دی

اس توقع پر کہ شاید تو پلٹ کر دیکھتا

میری قسمت کی لکیریں میرے ہاتھوں میں نہ تھیں

تیرے ماتھے پر کوئی میرا مقدر دیکھتا

زندگی پھیلی ہوئی تھی شام ہجراں کی طرح

کس کو اتنا حوصلہ تھا کون جی کر دیکھتا

ڈوبنے والا تھا اور ساحل پہ چہروں کا ہجوم

پل کی مہلت تھی میں کس کو آنکھ بھر کر دیکھتا

تو بھی دل کو ایک خوں کی بوند سمجھا ہے فرازؔ

آنکھ اگر ہوتی تو قطرے میں سمندر دیکھتا

har tamashai faqat sahil se manzar dekhta

kaun dariya ko ulatta kaun gauhar dekhta

wo to duniya ko miri diwangi-e-khush a gai

tere hathon mein wagarna pahla patthar dekhta

ankh mein ansu jure the par sada tujh ko na di

is tawaqqo par ke shayad to palat kar dekhta

meri qismat ki lakiren mere hathon mein na thin

tere mathe par koi mera muqaddar dekhta

zindagi phaili hui thi sham-e-hijran ki tarah

kis ko itna hausla tha kaun ji kar dekhta

dubne wala tha aur sahil pe chehron ka hujum

pal ki mohlat thi main kis ko ankh bhar kar dekhta

tu bhi dil ko ek khun ki bund samjha hai faraz

ankh agar hoti to qatre mein samundar dekhta