وحشت دل صلۂ آبلہ پائی لے لے

وحشت دل صلۂ آبلہ پائی لے لے

مجھ سے یارب مرے لفظوں کی کمائی لے لے

عقل ہر بار دکھاتی تھی جلے ہاتھ اپنے

دل نے ہر بار کہا آگ پرائی لے لے

میں تو اس صبح درخشاں کو تونگر جانوں

جو مرے شہر سے کشکول گدائی لے لے

تو غنی ہے مگر اتنی ہیں شرائط تیری

وہ محبت جو ہمیں راس نہ آئی لے لے

ایسا نادان خریدار بھی کوئی ہوگا

جو ترے غم کے عوض ساری خدائی لے لے

اپنے دیوان کو گلیوں میں لیے پھرتا ہوں

ہے کوئی جو ہنر زخم نمائی لے لے

میری خاطر نہ سہی اپنی انا کی خاطر

اپنے بندوں سے تو پندار خدائی لے لے

اور کیا نذر کروں اے غم دل دار فرازؔ

زندگی جو غم دنیا سے بچائی لے لے

wahshat-e-dil sila-e-abla pai le le

mujh se yarab mire lafzon ki kamai le le

aql har bar dikhati thi jale hath apne

dil ne har bar kaha ag parai le le

main to is subh-e-darakhshan ko tawangar janun

jo mire shahr se kashkol-e-gadai le le

tu ghani hai magar itni hain sharait teri

wo mohabbat jo hamen ras na ai le le

aisa nadan kharidar bhi koi hoga

jo tire gham ke ewaz sari khudai le le

apne diwan ko galiyon mein liye phirta hun

hai koi jo hunar-e-zakhm numai le le

meri khatir na sahi apni ana ki khatir

apne bandon se to pindar-e-khudai le le

aur kya nazr karun ai gham-e-dil dar faraz

zindagi jo gham-e-duniya se bachai le le