مزاج ہم سے زیادہ جدا نہ تھا اس کا

مزاج ہم سے زیادہ جدا نہ تھا اس کا

جب اپنے طور یہی تھے تو کیا گلہ اس کا

وہ اپنے زعم میں تھا بے خبر رہا مجھ سے

اسے گماں بھی نہیں میں نہیں رہا اس کا

وہ برق رو تھا مگر وہ گیا کہاں جانے

اب انتظار کریں گے شکستہ پا اس کا

چلو یہ سیل بلا خیز ہی بنے اپنا

سفینہ اس کا خدا اس کا ناخدا اس کا

یہ اہل درد بھی کس کی دہائی دیتے ہیں

وہ چپ بھی ہو تو زمانہ ہے ہم نوا اس کا

ہمیں نے ترک تعلق میں پہل کی کہ فرازؔ

وہ چاہتا تھا مگر حوصلہ نہ تھا اس کا

mizaj ham se ziyada juda na tha us ka

jab apne taur yahi the to kya gila us ka

wo apne zaam mein tha be khabar raha mujh se

use guman bhi nahin main nahin raha us ka

wo barq ro tha magar wo gaya kahan jane

ab intizar karenge shikasta pa us ka

chalo ye sail-e-bala khez hi bane apna

safina us ka khuda us ka nakhuda us ka

ye ahl-e-dard bhi kis ki duhai dete hain

wo chup bhi ho to zamana hai ham nawa us ka

hamen ne tark-e-taalluq mein pahal ki ke faraz

wo chahta tha magar hausla na tha us ka