کیوں نہ ہم عہد رفاقت کو بھلانے لگ جائیں

کیوں نہ ہم عہد رفاقت کو بھلانے لگ جائیں

شاید اس زخم کو بھرنے میں زمانے لگ جائیں

نہیں ایسا بھی کہ اک عمر کی قربت کے نشے

ایک دو روز کی رنجش سے ٹھکانے لگ جائیں

یہی ناصح جو ہمیں تجھ سے نہ ملنے کو کہیں

تجھ کو دیکھیں تو تجھے دیکھنے آنے لگ جائیں

ہم کہ ہیں لذت آزار کے مارے ہوئے لوگ

چارہ گر آئیں تو زخموں کو چھپانے لگ جائیں

ربط کے سینکڑوں حیلے ہیں محبت نہ سہی

ہم ترے ساتھ کسی اور بہانے لگ جائیں

ساقیا مسجد و مکتب تو نہیں مے خانہ

دیکھنا پھر بھی غلط لوگ نہ آنے لگ جائیں

قرب اچھا ہے مگر اتنی بھی شدت سے نہ مل

یہ نہ ہو تجھ کو مرے روگ پرانے لگ جائیں

اب فرازؔ آؤ چلیں اپنے قبیلے کی طرف

شاعری ترک کریں بوجھ اٹھانے لگ جائیں

kyun na ham ahd rifaqat ko bhulane lag jaen

shayad is zakhm ko bharne mein zamane lag jaen

nahin aisa bhi ke ik umr ki qurbat ke nashe

ek do roz ki ranjish se thikane lag jaen

yahi naseh jo hamen tujh se na milne ko kahin

tujh ko dekhen to tujhe dekhne ane lag jaen

ham ke hain lazzat-e-azar ke mare hue log

chara gar aen to zakhmon ko chhupane lag jaen

rabt ke sainkron hile hain mohabbat na sahi

ham tire sath kisi aur bahane lag jaen

saqiya masjid-o-maktab to nahin mai khana

dekhna phir bhi ghalat log na ane lag jaen

qurb achchha hai magar itni bhi shiddat se na mil

ye na ho tujh ko mire rog purane lag jaen

ab faraz ao chalen apne qabile ki taraf

shayari tark karen bojh uthane lag jaen