Arooz is now on the App Store, for iPhone and iPad. Download →

All poetry

دل بدن کا شریک حال کہاں

Ahmad Faraz (1931–2008)

دل بدن کا شریک حال کہاں

ہجر پھر ہجر ہے وصال کہاں

عشق ہے نام انتہاؤں کا

اس سمندر میں اعتدال کہاں

ایسا نشہ تو زہر میں بھی نہ تھا

اے غم دل تری مثال کہاں

ہم کو بھی اپنی پائمالی کا

ہے مگر اس قدر ملال کہاں

میں نئی دوستی کے موڑ پہ تھا

آ گیا ہے ترا خیال کہاں

دل کہ خوش فہم تھا سو ہے ورنہ

تیرے ملنے کا احتمال کہاں

وصل و ہجراں ہیں اور دنیائیں

ان زمانوں میں ماہ و سال کہاں

تجھ کو دیکھا تو لوگ حیراں ہیں

آ گیا شہر میں غزال کہاں

تجھ پہ لکھی تو سج گئی ہے غزل

آ ملا خواب سے خیال کہاں

اب تو شہہ مات ہو رہی ہے فرازؔ

اب بچاؤ کی کوئی چال کہاں