جس سے یہ طبیعت بڑی مشکل سے لگی تھی

جس سے یہ طبیعت بڑی مشکل سے لگی تھی

دیکھا تو وہ تصویر ہر اک دل سے لگی تھی

تنہائی میں روتے ہیں کہ یوں دل کو سکوں ہو

یہ چوٹ کسی صاحب محفل سے لگی تھی

اے دل ترے آشوب نے پھر حشر جگایا

بے درد ابھی آنکھ بھی مشکل سے لگی تھی

خلقت کا عجب حال تھا اس کوئے ستم میں

سائے کی طرح دامن قاتل سے لگی تھی

اترا بھی تو کب درد کا چڑھتا ہوا دریا

جب کشتیٔ جاں موت کے ساحل سے لگی تھی

jis se ye tabiat bari mushkil se lagi thi

dekha to wo taswir har ik dil se lagi thi

tanhai mein rote hain ke yun dil ko sakun ho

ye chot kisi sahab-e-mahfil se lagi thi

ai dil tire ashob ne phir hashr jagaya

be dard abhi ankh bhi mushkil se lagi thi

khilqat ka ajab hal tha is ku-e-sitam mein

sae ki tarah daman-e-qatil se lagi thi

utra bhi to kab dard ka charhta hua dariya

jab kashti-e-jan maut ke sahil se lagi thi