ہر ایک بات نہ کیوں زہر سی ہماری لگے

ہر ایک بات نہ کیوں زہر سی ہماری لگے

کہ ہم کو دست زمانہ سے زخم کاری لگے

اداسیاں ہوں مسلسل تو دل نہیں روتا

کبھی کبھی ہو تو یہ کیفیت بھی پیاری لگے

بظاہر ایک ہی شب ہے فراق یار مگر

کوئی گزارنے بیٹھے تو عمر ساری لگے

علاج اس دل درد آشنا کا کیا کیجے

کہ تیر بن کے جسے حرف غم گساری لگے

ہمارے پاس بھی بیٹھو بس اتنا چاہتے ہیں

ہمارے ساتھ طبیعت اگر تمہاری لگے

فرازؔ تیرے جنوں کا خیال ہے ورنہ

یہ کیا ضرور وہ صورت سبھی کو پیاری لگے

har ek bat na kyun zahr si hamari lage

ke ham ko dast-e-zamana se zakhm-e-kari lage

udasiyan hun musalsal to dil nahin rota

kabhi kabhi ho to ye kaifiyat bhi pyari lage

bazahir ek hi shab hai firaq-e-yar magar

koi guzarne baithe to umr sari lage

ilaj is dil-e-dard ashna ka kya kije

ke tir ban ke jise harf-e-gham gusari lage

hamare pas bhi baitho bas itna chahte hain

hamare sath tabiat agar tumhari lage

faraz tere junun ka khayal hai warna

ye kya zarur wo surat sabhi ko pyari lage