ترس رہا ہوں مگر تو نظر نہ آ مجھ کو

ترس رہا ہوں مگر تو نظر نہ آ مجھ کو

کہ خود جدا ہے تو مجھ سے نہ کر جدا مجھ کو

وہ کپکپاتے ہوئے ہونٹ میرے شانے پر

وہ خواب سانپ کی مانند ڈس گیا مجھ کو

چٹخ اٹھا ہو سلگتی چٹان کی صورت

پکار اب تو مرے دیر آشنا مجھ کو

تجھے تراش کے میں سخت منفعل ہوں کہ لوگ

تجھے صنم تو سمجھنے لگے خدا مجھ کو

یہ اور بات کہ اکثر دمک اٹھا چہرہ

کبھی کبھی یہی شعلہ بجھا گیا مجھ کو

یہ قربتیں ہی تو وجہ فراق ٹھہری ہیں

بہت عزیز ہیں یاران بے وفا مجھ کو

ستم تو یہ ہے کہ ظالم سخن شناس نہیں

وہ ایک شخص کہ شاعر بنا گیا مجھ کو

اسے فرازؔ اگر دکھ نہ تھا بچھڑنے کا

تو کیوں وہ دور تلک دیکھتا رہا مجھ کو

taras raha hun magar tu nazar na a mujh ko

ke khud juda hai to mujh se na kar juda mujh ko

wo kapkapate hue hont mere shane par

wo khwab sanp ki manind das gaya mujh ko

chatakh utha ho sulagti chatan ki surat

pukar ab to mire der ashna mujh ko

tujhe tarash ke main sakht munfail hun ke log

tujhe sanam to samajhne lage khuda mujh ko

ye aur bat ke aksar damak utha chehra

kabhi kabhi yahi shola bujha gaya mujh ko

ye qurbaten hi to wajh-e-firaq thahri hain

bahut aziz hain yaran-e-be wafa mujh ko

sitam to ye hai ke zalim sukhan shanas nahin

wo ek shakhs ke shayar bana gaya mujh ko

use faraz agar dukh na tha bichharne ka

to kyun wo dur talak dekhta raha mujh ko