مستقل محرومیوں پر بھی تو دل مانا نہیں

مستقل محرومیوں پر بھی تو دل مانا نہیں

لاکھ سمجھایا کہ اس محفل میں اب جانا نہیں

خود فریبی ہی سہی کیا کیجئے دل کا علاج

تو نظر پھیرے تو ہم سمجھیں کہ پہچانا نہیں

ایک دنیا منتظر ہے اور تیری بزم میں

اس طرح بیٹھے ہیں ہم جیسے کہیں جانا نہیں

جی میں جو آتی ہے کر گزرو کہیں ایسا نہ ہو

کل پشیماں ہوں کہ کیوں دل کا کہا مانا نہیں

زندگی پر اس سے بڑھ کر طنز کیا ہوگا فرازؔ

اس کا یہ کہنا کہ تو شاعر ہے دیوانا نہیں

mustaqil mahrumiyon par bhi to dil mana nahin

lakh samjhaya ke is mahfil mein ab jana nahin

khud farebi hi sahi kya kijiye dil ka ilaj

tu nazar phere to ham samjhen ke pahchana nahin

ek duniya muntazir hai aur teri bazm mein

is tarah baithe hain ham jaise kahin jana nahin

ji mein jo ati hai kar guzro kahin aisa na ho

kal pasheman hun ke kyun dil ka kaha mana nahin

zindagi par is se barh kar tanz kya hoga faraz

us ka ye kahna ke tu shayar hai diwana nahin