تیرے ہوتے ہوئے محفل میں جلاتے ہیں چراغ

تیرے ہوتے ہوئے محفل میں جلاتے ہیں چراغ

لوگ کیا سادہ ہیں سورج کو دکھاتے ہیں چراغ

اپنی محرومی کے احساس سے شرمندہ ہیں

خود نہیں رکھتے تو اوروں کے بجھاتے ہیں چراغ

بستیاں دور ہوئی جاتی ہیں رفتہ رفتہ

دم بہ دم آنکھوں سے چھپتے چلے جاتے ہیں چراغ

کیا خبر ان کو کہ دامن بھی بھڑک اٹھتے ہیں

جو زمانے کی ہواؤں سے بچاتے ہیں چراغ

گو سیہ بخت ہیں ہم لوگ پہ روشن ہے ضمیر

خود اندھیرے میں ہیں دنیا کو دکھاتے ہیں چراغ

بستیاں چاند ستاروں کی بسانے والو

کرۂ ارض پہ بجھتے چلے جاتے ہیں چراغ

ایسے بے درد ہوئے ہم بھی کہ اب گلشن پر

برق گرتی ہے تو زنداں میں جلاتے ہیں چراغ

ایسی تاریکیاں آنکھوں میں بسی ہیں کہ فرازؔ

رات تو رات ہے ہم دن کو جلاتے ہیں چراغ

tere hote hue mahfil mein jalate hain charagh

log kya sada hain suraj ko dikhate hain charagh

apni mahrumi ke ehsas se sharminda hain

khud nahin rakhte to auron ke bujhate hain charagh

bastiyan dur hui jati hain rafta rafta

dam ba dam ankhon se chhupte chale jate hain charagh

kya khabar un ko ke daman bhi bharak uthte hain

jo zamane ki hawaon se bachate hain charagh

go siyah bakht hain ham log pe raushan hai zamir

khud andhere mein hain duniya ko dikhate hain charagh

bastiyan chand sitaron ki basane walo

kura-e-arz pe bujhte chale jate hain charagh

aise be dard hue ham bhi ke ab gulshan par

barq girti hai to zindan mein jalate hain charagh

aisi tarikiyan ankhon mein basi hain ke faraz

rat to rat hai ham din ko jalate hain charagh