شمع کے ساتھ عجب لطف ہے پروانے کو

شمع کے ساتھ عجب لطف ہے پروانے کو

آگ سے کھیلتے دیکھا اسی دیوانے کو

لیے بیٹھے رہیں آپ آئنے کو شانے کو

ہم بھی آ جائیں ذرا زلف کے سلجھانے کو

شب وعدہ ارے او شام سے سونے والے

کھل کے کلیاں مرے بستر کی ہیں مرجھانے کو

اے مری چشم تصور ترے صدقے سو بار

تو پری خانہ بنا دیتی ہے ویرانے کو

دل بھی نازک یہ کڑی چوٹ بھی پتھر سے سوا

پھول سے کوئی نہ مارے کسی دیوانے کو

اب ٹھہرتا ہی نہیں سینے پر آنچل ان کا

وہ جوانی میں پھرے اور ستم ڈھانے کو

ارے دیوانے سمجھنے کا نہیں ایک کی میں

تجھ سے سو آئیں جو ناصح مرے سمجھانے کو

خانقاہوں سے ہے پوشیدہ تعلق جن کا

راستے ایسے گئے ہیں کئی میخانے کو

اے صبا پھولوں کی ہو شاخ کہ موج مے ناب

کچھ بنی ہے کمر یار ہی بل کھانے کو

سنئے محشر میں نہ دنیا کی کہانی مجھ سے

کیجیے یاد نہ بھولے ہوئے افسانے کو

پھل میں پا جاؤں عبادت کا بنا دے یا رب

دانہ انگور کا تسبیح کے ہر دانے کو

بعد توبہ بھی یہ پھینکا نہیں جاتا ہم سے

ہم لیے بیٹھے ہیں ٹوٹے ہوئے پیمانے کو

حشر میں فرد عمل کھینچ کے ماروں منہ پر

ساتھ آئے ہیں فرشتے مجھے شرمانے کو

حسن کے رعب نے محفل میں بٹھائے پہرے

شمع تک آئے اجازت نہیں پروانے کو

لاؤں افشردۂ انگور کہاں سے اے شیخ

ایک دانہ بھی نہیں گھر میں قسم کھانے کو

جیسے ساقی تری ہنستی ہوئی تصویر شباب

ہم نے دیکھا ہے چھلکتے ہوئے پیمانے کو

آ کے بے موسم گل توڑیں گے توبہ شاید

غل ہے رندوں میں ریاضؔ آتے ہیں میخانے کو

shama ke sath ajab lutf hai parwane ko

ag se khelte dekha isi diwane ko

liye baithe rahen ap aine ko shane ko

ham bhi a jaen zara zulf ke sulajhane ko

shab-e-waada are o sham se sone wale

khul ke kaliyan mire bistar ki hain murjhane ko

ai miri chashm-e-tasawwur tire sadqe sau bar

tu pari khana bana deti hai wirane ko

dil bhi nazuk ye kari chot bhi patthar se siwa

phul se koi na mare kisi diwane ko

ab thaharta hi nahin sine par anchal un ka

wo jawani mein phire aur sitam dhane ko

are diwane samajhne ka nahin ek ki main

tujh se so aen jo naseh mire samjhane ko

khanqahon se hai poshida taalluq jin ka

raste aise gae hain kai maikhane ko

ai saba phulon ki ho shakh ke mauj-e-mai nab

kuchh bani hai kamar-e-yar hi bal khane ko

suniye mahshar mein na duniya ki kahani mujh se

kijiye yad na bhule hue afsane ko

phal mein pa jaun ibadat ka bana de ya rab

dana angur ka tasbih ke har dane ko

baad tauba bhi ye phenka nahin jata ham se

ham liye baithe hain tute hue paimane ko

hashr mein fard-e-amal khinch ke marun munh par

sath ae hain farishte mujhe sharmane ko

husn ke rob ne mahfil mein bithae pahre

shama tak ae ijazat nahin parwane ko

laun afshurda-e-angur kahan se ai shaikh

ek dana bhi nahin ghar mein qasam khane ko

jaise saqi tiri hansti hui taswir shabab

ham ne dekha hai chhalakte hue paimane ko

a ke be mausam-e-gul torenge tauba shayad

ghul hai rindon mein riyaz ate hain maikhane ko