Arooz is now on the App Store, for iPhone and iPad. Download →

All poetry

تو کہ انجان ہے اس شہر کے آداب سمجھ

Ahmad Faraz (1931–2008)

تو کہ انجان ہے اس شہر کے آداب سمجھ

پھول روئے تو اسے خندۂ شاداب سمجھ

کہیں آ جائے میسر تو مقدر تیرا

ورنہ آسودگیٔ دہر کو نایاب سمجھ

حسرت گریہ میں جو آگ ہے اشکوں میں نہیں

خشک آنکھوں کو میری چشمہ بے آب سمجھ

موج دریا ہی کو آوارۂ سد شوق نہ کہہ

ریگ ساحل کو بھی لب تشنہ سیلاب سمجھ

یہ بھی وا ہے کسی مانوس کرن کی خاطر

روزن در کو بھی اک دیدۂ بے خواب سمجھ

اب کسے ساحل امید سے تکتا ہے فرازؔ

وہ جو اک کشتئ دل تھی اسے غرقاب سمجھ