شگفت گل کی صدا میں رنگ چمن میں آؤ

شگفت گل کی صدا میں رنگ چمن میں آؤ

کوئی بھی رت ہو بہار کے پیرہن میں آؤ

کوئی سفر ہو تمہیں کو منزل سمجھ کے جاؤں

کوئی مسافت ہو تم مری ہی لگن میں آؤ

کبھی تو ایسا بھی ہو کہ لوگوں کی بات سن کر

مری طرف تم رقابتوں کی جلن میں آؤ

وہ جس غرور اور ناز سے تم چلے گئے تھے

کبھی اسی تمکنت اسی بانکپن میں آؤ

یہ کیوں ہمیشہ مری طلب ہی تمہیں صدا دے

کبھی تو خود بھی سپردگی کی تھکن میں آؤ

ہزار مفلس سہی مگر ہم سخی بلا کے

کبھی تو تم اہل درد کی انجمن میں آؤ

ہم اہل دل ہیں ہماری اقلیم حرف کی ہے

کبھی تو جان سخن دیار سخن میں آؤ

کبھی کبھی دوریوں سے کوئی پکارتا ہے

فرازؔ جانی فرازؔ پیارے وطن میں آؤ

shagfat gul ki sada mein rang-e-chaman mein ao

koi bhi rut ho bahar ke pairahan mein ao

koi safar ho tumhen ko manzil samajh ke jaun

koi masafat ho tum miri hi lagan mein ao

kabhi to aisa bhi ho ke logon ki bat sun kar

miri taraf tum raqabaton ki jalan mein ao

wo jis ghurur aur naz se tum chale gae the

kabhi isi tamkanat isi bankpan mein ao

ye kyun hamesha miri talab hi tumhen sada de

kabhi to khud bhi supurdagi ki thakan mein ao

hazar muflis sahi magar ham sakhi bala ke

kabhi to tum ahl-e-dard ki anjuman mein ao

ham ahl-e-dil hain hamari iqlim harf ki hai

kabhi to jan-e-sukhan dayar-e-sukhan mein ao

kabhi kabhi duriyon se koi pukarta hai

faraz jani faraz pyare watan mein ao