اس منظر سادہ میں کئی جال بندھے تھے

اس منظر سادہ میں کئی جال بندھے تھے

جب اس کا گریبان کھلا بال بندھے تھے

اے زود فراموش کہاں تو ہے کہ تجھ سے

میرے تو شب و روز مہ و سال بندھے تھے

وہ رشک غزالاں تھا مگر دام میں اس کے

ہم جیسے کئی صید زبوں حال بندھے تھے

دیکھے کوئی ناصح کی جو حالت ہے کہ ہم تو

اس بت کی محبت میں بہرحال بندھے تھے

صیاد کو پھر بھی مری پرواز کا ڈر تھا

میں گرچہ قفس میں تھا پر و بال بندھے تھے

یوں دل تہہ و بالا کبھی ہوتے نہیں دیکھے

اک شخص کے پاؤں سے تو بھونچال بندھے تھے

وقت آیا تو میں مقتل جاں میں تھا اکیلا

یاروں کی گرہ میں فقط اقوال بندھے تھے

is manzar sada mein kai jal bandhe the

jab us ka gareban khula bal bandhe the

ai zud faramosh kahan to hai ke tujh se

mere to shab-o-roz mah-o-sal bandhe the

wo rashk-e-ghazalan tha magar dam mein us ke

ham jaise kai said-e-zabun hal bandhe the

dekhe koi naseh ki jo halat hai ke ham to

us but ki mohabbat mein bahrhal bandhe the

sayyad ko phir bhi miri parwaz ka dar tha

main garche qafas mein tha par-o-bal bandhe the

yun dil tah-o-bala kabhi hote nahin dekhe

ik shakhs ke paon se to bhaunchal bandhe the

waqt aya to main maqtal-e-jan mein tha akela

yaron ki girah mein faqat aqwal bandhe the