Arooz is now on the App Store, for iPhone and iPad. Download →

All poetry

ہر کوئی طرۂ پیچاک پہن کر نکلا

Ahmad Faraz (1931–2008)

ہر کوئی طرۂ پیچاک پہن کر نکلا

ایک میں پیرہن خاک پہن کر نکلا

اور پھر سب نے یہ دیکھا کہ اسی مقتل سے

میرا قاتل مری پوشاک پہن کر نکلا

ایک بندہ تھا کہ اوڑھے تھا خدائی ساری

اک ستارہ تھا کہ افلاک پہن کر نکلا

ایسی نفرت تھی کہ اس شہر کو جب آگ لگی

ہر بگولہ خس و خاشاک پہن کر نکلا

ترکش و دام عبث لے کے چلا ہے صیاد

جو بھی نخچیر ہے فتراک پہن کر نکلا

اس کے قامت سے اسے جان گئے لوگ فرازؔ

جو لبادہ بھی وہ چالاک پہن کر نکلا