سوئے فلک نہ جانب مہتاب دیکھنا

سوئے فلک نہ جانب مہتاب دیکھنا

اس شہر دل نواز کے آداب دیکھنا

تجھ کو کہاں چھپائیں کہ دل پر گرفت ہو

آنکھوں کو کیا کریں کہ وہی خواب دیکھنا

وہ موج خوں اٹھی ہے کہ دیوار و در کہاں

اب کے فصیل شہر کو غرقاب دیکھنا

ان صورتوں کو ترسے گی چشم جہاں کہ آج

کم یاب ہیں تو کل ہمیں نایاب دیکھنا

پھر خون خلق و گردن مینا بچائیو

پر چل پڑا ہے ذکر مئے ناب دیکھنا

آباد کوئے چاک گریباں جو پھر ہوا

دست رقیب و دامن احباب دیکھنا

ہم لے تو آئے ہیں تجھے اک بے دلی کے ساتھ

اس انجمن میں اے دل بیتاب دیکھنا

حد چاہئے فرازؔ وفا میں بھی اور تمہیں

غم دیکھنا نہ دل کی تب و تاب دیکھنا

su-e-falak na janib-e-mahtab dekhna

is shahr-e-dil nawaz ke adab dekhna

tujh ko kahan chhupaen ke dil par giraft ho

ankhon ko kya karen ke wahi khwab dekhna

wo mauj-e-khun uthi hai ke diwar-o-dar kahan

ab ke fasil-e-shahr ko gharqab dekhna

in suraton ko tarsegi chashm-e-jahan ke aj

kam yab hain to kal hamen nayab dekhna

phir khun-e-khalq-o-gardan-e-mina bachaiyo

par chal para hai zikr-e-mai-e-nab dekhna

abad ku-e-chak-e-gareban jo phir hua

dast-e-raqib-o-daman-e-ahbab dekhna

ham le to ae hain tujhe ik be dili ke sath

is anjuman mein ai dil-e-betab dekhna

had chahiye faraz-e-wafa mein bhi aur tumhen

gham dekhna na dil ki tab-o-tab dekhna