نہیں کہ نامہ بروں کو تلاش کرتے ہیں

نہیں کہ نامہ بروں کو تلاش کرتے ہیں

ہم اپنے بے خبروں کو تلاش کرتے ہیں

محبتوں کا بھی موسم ہے جب گزر جائے

سب اپنے اپنے گھروں کو تلاش کرتے ہیں

سنا ہے کل جنہیں دستار افتخار ملی

وہ آج اپنے سروں کو تلاش کرتے ہیں

یہ عشق کیا ہے کہ اظہار آرزو کے لیے

حریف نوحہ گروں کو تلاش کرتے ہیں

یہ ہم جو ڈھونڈتے پھرتے ہیں قتل گاہوں کو

دراصل چارہ گروں کو تلاش کرتے ہیں

رہا ہوئے پہ عجب حال ہے اسیروں کا

کہ اب وہ اپنے پروں کو تلاش کرتے ہیں

فرازؔ داد کے قابل ہے جستجو ان کی

جو ہم سے دربدروں کو تلاش کرتے ہیں

nahin ke nama buron ko talash karte hain

ham apne be khabron ko talash karte hain

mohabbaton ka bhi mausam hai jab guzar jae

sab apne apne gharon ko talash karte hain

suna hai kal jinhen dastar iftikhar mili

wo aj apne saron ko talash karte hain

ye ishq kya hai ke izhar-e-arzu ke liye

harif-e-nauha garon ko talash karte hain

ye ham jo dhundte phirte hain qatl gahon ko

darasl chara garon ko talash karte hain

raha hue pe ajab hal hai asiron ka

ke ab wo apne paron ko talash karte hain

faraz dad ke qabil hai justuju un ki

jo ham se darbadaron ko talash karte hain