قامت کو تیرے سرو صنوبر نہیں کہا

قامت کو تیرے سرو صنوبر نہیں کہا

جیسا بھی تو تھا اس سے تو بڑھ کر نہیں کہا

اس سے ملے تو زعم تکلم کے باوجود

جو سوچ کر گئے وہی اکثر نہیں کہا

اتنی مروتیں تو کہاں دشمنوں میں تھیں

یاروں نے جو کہا مرے منہ پر نہیں کہا

مجھ سا گناہ گار سر دار کہہ گیا

واعظ نے جو سخن سر منبر نہیں کہا

برہم بس اس خطا پہ امیران شہر ہیں

ان جوہڑوں کو میں نے سمندر نہیں کہا

یہ لوگ میری فرد عمل دیکھتے ہیں کیوں

میں نے فرازؔ خود کو پیمبر نہیں کہا

qamat ko tere sarw sanobar nahin kaha

jaisa bhi to tha us se to barh kar nahin kaha

us se mile to zaam takallum ke bawajud

jo soch kar gae wahi aksar nahin kaha

itni murawwaten to kahan dushmanon mein thin

yaron ne jo kaha mire munh par nahin kaha

mujh sa gunah gar sar-e-dar kah gaya

waiz ne jo sukhan sar-e-mimbar nahin kaha

barham bas is khata pe amiran shahr hain

in joharon ko main ne samundar nahin kaha

ye log meri fard-e-amal dekhte hain kyun

main ne faraz khud ko payambar nahin kaha