ہر آشنا میں کہاں خوئے محرمانہ وہ

ہر آشنا میں کہاں خوئے محرمانہ وہ

کہ بے وفا تھا مگر دوست تھا پرانا وہ

پکارتے ہیں مہ و سال منزلوں کی طرح

لگا ہے توسن ہستی کو تازیانہ وہ

ہمیں بھی غم طلبی کا نہیں رہا یارا

ترے بھی رنگ نہیں گردش زمانہ وہ

اب اپنی خواہشیں کیا کیا اسے رلاتی ہیں

یہ بات ہم نے کہی تھی مگر نہ مانا وہ

یہی کہیں گے کہ بس صورت آشنائی تھی

جو عہد ٹوٹ چکا یاد کیا دلانا وہ

اس ایک شکل میں کیا کیا نہ صورتیں دیکھیں

نگار تھا نظر آیا نگار خانہ وہ

بجھا دیا ہے تجھے بھی فرازؔ دنیا نے

کہاں گیا ترا ہر وقت مسکرانا وہ

har ashna mein kahan khu-e-mahramana wo

ke be wafa tha magar dost tha purana wo

pukarte hain mah-o-sal manzilon ki tarah

laga hai tosun-e-hasti ko taziyana wo

hamen bhi gham talbi ka nahin raha yara

tire bhi rang nahin gardish-e-zamana wo

ab apni khwahishen kya kya use rulati hain

ye bat ham ne kahi thi magar na mana wo

yahi kahenge ke bas surat ashnai thi

jo ahd tut chuka yad kya dilana wo

us ek shakl mein kya kya na suraten dekhen

nigar tha nazar aya nigar khana wo

bujha diya hai tujhe bhi faraz duniya ne

kahan gaya tira har waqt muskurana wo