یہ طبیعت ہے تو خود آزار بن جائیں گے ہم

یہ طبیعت ہے تو خود آزار بن جائیں گے ہم

چارہ گر روئیں گے اور غم خوار بن جائیں گے ہم

ہم سر چاک وفا ہیں اور ترا دست ہنر

جو بنا دے گا ہمیں اے یار بن جائیں گے ہم

کیا خبر تھی اے نگار شعر تیرے عشق میں

دلبران شہر کے دل دار بن جائیں گے ہم

سخت جاں ہیں پر ہماری استواری پر نہ جا

ایسے ٹوٹیں گے ترا اقرار بن جائیں گے ہم

اور کچھ دن بیٹھنے دو کوئے جاناں میں ہمیں

رفتہ رفتہ سایۂ دیوار بن جائیں گے ہم

اس قدر آساں نہ ہوگی ہر کسی سے دوستی

آشنائی میں ترا معیار بن جائیں گے ہم

میرؔ و غالبؔ کیا کہ بن پائے نہیں فیضؔ و فراقؔ

زعم یہ تھا رومیؔ و عطارؔ بن جائیں گے ہم

ye tabiat hai to khud azar ban jaenge ham

chara gar roenge aur gham khwar ban jaenge ham

ham sar chak-e-wafa hain aur tira dast-e-hunar

jo bana dega hamen ai yar ban jaenge ham

kya khabar thi ai nigar-e-sher tere ishq mein

dilbaran-e-shahr ke dil dar ban jaenge ham

sakht jan hain par hamari ustuwari par na ja

aise tutenge tira iqrar ban jaenge ham

aur kuchh din baithne do ku-e-janan mein hamen

rafta rafta saya-e-diwar ban jaenge ham

is qadar asan na hogi har kisi se dosti

ashnai mein tira meyar ban jaenge ham

mir-o-ghalib kya ke ban pae nahin faiz-o-firaq

zaam ye tha rumi-o-attar ban jaenge ham