نہ سہہ سکا جب مسافتوں کے عذاب سارے

نہ سہہ سکا جب مسافتوں کے عذاب سارے

تو کر گئے کوچ میری آنکھوں سے خواب سارے

بیاض دل پر غزل کی صورت رقم کیے ہیں

ترے کرم بھی ترے ستم بھی حساب سارے

بہار آئی ہے تم بھی آؤ ادھر سے گزرو

کہ دیکھنا چاہتے ہیں تم کو گلاب سارے

یہ سانحہ ہے کہ واعظوں سے الجھ پڑے ہم

یہ واقعہ ہے کہ پی رہے تھے شراب سارے

بھلا ہوا ہم گناہ گاروں نے ضد نہیں کی

سمیٹ کر لے گیا ہے ناصح ثواب سارے

فرازؔ کس نے مرے مقدر میں لکھ دیے ہیں

بس ایک دریا کی دوستی میں سراب سارے

na sah saka jab masafaton ke azab sare

tu kar gae kuch meri ankhon se khwab sare

bayaz-e-dil par ghazal ki surat raqam kiye hain

tire karam bhi tire sitam bhi hisab sare

bahar ai hai tum bhi ao idhar se guzro

ke dekhna chahte hain tum ko gulab sare

ye saneha hai ke waizon se ulajh pare ham

ye waqia hai ke pi rahe the sharab sare

bhala hua ham gunah garon ne zid nahin ki

samet kar le gaya hai naseh sawab sare

faraz kis ne mire muqaddar mein likh diye hain

bas ek dariya ki dosti mein sarab sare