نوحہ گروں میں دیدۂ تر بھی اسی کا تھا

نوحہ گروں میں دیدۂ تر بھی اسی کا تھا

مجھ پر یہ ظلم بار دگر بھی اسی کا تھا

دیکھا مجھے تو ترک تعلق کے باوجود

وہ مسکرا دیا یہ ہنر بھی اسی کا تھا

آنکھیں کشاد و بست سے بدنام ہو گئیں

سورج اسی کا خواب سحر بھی اسی کا تھا

خنجر در آستیں ہی ملا جب کبھی ملا

وہ تیغ کھینچتا تو یہ سر بھی اسی کا تھا

نشتر چبھے ہوئے تھے رگ جاں کے آس پاس

وہ چارہ گر تھا اور مجھے ڈر بھی اسی کا تھا

محفل میں کل فرازؔ ہی شاید تھا لب کشا

مقتل میں آج کاسۂ سر بھی اسی کا تھا

nauha garon mein dida-e-tar bhi usi ka tha

mujh par ye zulm bar-e-digar bhi usi ka tha

dekha mujhe to tark-e-taalluq ke bawajud

wo muskura diya ye hunar bhi usi ka tha

ankhen kushad-o-bast se badnam ho gain

suraj usi ka khwab-e-sahar bhi usi ka tha

khanjar dar astin hi mila jab kabhi mila

wo tegh khinchta to ye sar bhi usi ka tha

nashtar chubhe hue the rag-e-jan ke as pas

wo chara gar tha aur mujhe dar bhi usi ka tha

mahfil mein kal faraz hi shayad tha lab kusha

maqtal mein aj kasa-e-sar bhi usi ka tha