سکوت شام خزاں ہے قریب آ جاؤ

سکوت شام خزاں ہے قریب آ جاؤ

بڑا اداس سماں ہے قریب آ جاؤ

نہ تم کو خود پہ بھروسہ نہ ہم کو زعم وفا

نہ اعتبار جہاں ہے قریب آ جاؤ

رہ طلب میں کسی کو کسی کا دھیان نہیں

ہجوم ہم سفراں ہے قریب آ جاؤ

جو دشت عشق میں بچھڑے وہ عمر بھر نہ ملے

یہاں دھواں ہی دھواں ہے قریب آ جاؤ

یہ آندھیاں ہیں تو شہر وفا کی خیر نہیں

زمانہ خاک فشاں ہے قریب آ جاؤ

فقیہ شہر کی مجلس نہیں کہ دور رہو

یہ بزم پیر مغاں ہے قریب آ جاؤ

فرازؔ دور کے سورج غروب سمجھے گئے

یہ دور کم نظراں ہے قریب آ جاؤ

sukut-e-sham-e-khizan hai qarib a jao

bara udas saman hai qarib a jao

na tum ko khud pe bharosa na ham ko zaam-e-wafa

na etibar jahan hai qarib a jao

rah-e-talab mein kisi ko kisi ka dhyan nahin

hujum ham safaran hai qarib a jao

jo dasht-e-ishq mein bichhre wo umr bhar na mile

yahan dhuan hi dhuan hai qarib a jao

ye andhiyan hain to shahr-e-wafa ki khair nahin

zamana khak fishan hai qarib a jao

faqih-e-shahr ki majlis nahin ke dur raho

ye bazm-e-pir-e-mughan hai qarib a jao

faraz dur ke suraj ghurub samjhe gae

ye daur kam nazaran hai qarib a jao