قرب جاناں کا نہ مے خانے کا موسم آیا

قرب جاناں کا نہ مے خانے کا موسم آیا

پھر سے بے صرفہ اجڑ جانے کا موسم آیا

کنج غربت میں کبھی گوشۂ زنداں میں تھے ہم

جان جاں جب بھی ترے آنے کا موسم آیا

اب لہو رونے کی خواہش نہ لہو ہونے کی

دل زندہ ترے مر جانے کا موسم آیا

کوچۂ یار سے ہر فصل میں گزرے ہیں مگر

شاید اب جاں سے گزر جانے کا موسم آیا

کوئی زنجیر کوئی حرف خرد لے آیا

فصل گل آئی کہ دیوانے کا موسم آیا

سیل خوں شہر کی گلیوں میں در آیا ہے فرازؔ

اور تو خوش ہے کہ گھر جانے کا موسم آیا

qurb janan ka na mai khane ka mausam aya

phir se be sarfa ujar jane ka mausam aya

kunj-e-ghurbat mein kabhi gosha-e-zindan mein the ham

jan-e-jan jab bhi tire ane ka mausam aya

ab lahu rone ki khwahish na lahu hone ki

dil-e-zinda tire mar jane ka mausam aya

kucha-e-yar se har fasl mein guzre hain magar

shayad ab jan se guzar jane ka mausam aya

koi zanjir koi harf-e-khirad le aya

fasl-e-gul ai ke diwane ka mausam aya

sail-e-khun shahr ki galiyon mein dar aya hai faraz

aur to khush hai ke ghar jane ka mausam aya