کسی جانب سے بھی پرچم نہ لہو کا نکلا

کسی جانب سے بھی پرچم نہ لہو کا نکلا

اب کے موسم میں بھی عالم وہی ہو کا نکلا

دست قاتل سے کچھ امید شفا تھی لیکن

نوک خنجر سے بھی کانٹا نہ گلو کا نکلا

عشق الزام لگاتا تھا ہوس پر کیا کیا

یہ منافق بھی ترے وصل کا بھوکا نکلا

جی نہیں چاہتا مے خانے کو جائیں جب سے

شیخ بھی بزم نشیں اہل سبو کا نکلا

دل کو ہم چھوڑ کے دنیا کی طرف آئے تھے

یہ شبستاں بھی اسی غالیہ مو کا نکلا

ہم عبث سوزن و رشتہ لیے گلیوں میں پھرے

کسی دل میں نہ کوئی کام رفو کا نکلا

یار بے فیض سے کیوں ہم کو توقع تھی فرازؔ

جو نہ اپنا نہ ہمارا نہ عدو کا نکلا

kisi janib se bhi parcham na lahu ka nikla

ab ke mausam mein bhi alam wahi ho ka nikla

dast-e-qatil se kuchh ummid-e-shifa thi lekin

nok-e-khanjar se bhi kanta na galo ka nikla

ishq ilzam lagata tha hawas par kya kiya

ye munafiq bhi tire wasl ka bhuka nikla

ji nahin chahta mai khane ko jaen jab se

shaikh bhi bazm nashin ahl-e-subu ka nikla

dil ko ham chhor ke duniya ki taraf ae the

ye shabistan bhi isi ghaliya mu ka nikla

ham abas sozan-o-rishta liye galiyon mein phire

kisi dil mein na koi kam rafu ka nikla

yar be faiz se kyun ham ko tawaqqo thi faraz

jo na apna na hamara na adu ka nikla