کشیدہ سر سے توقع عبث جھکاؤ کی تھی

کشیدہ سر سے توقع عبث جھکاؤ کی تھی

بگڑ گیا ہوں کہ صورت یہی بناؤ کی تھی

وہ جس گھمنڈ سے بچھڑا گلہ تو اس کا ہے

کہ ساری بات محبت میں رکھ رکھاؤ کی تھی

وہ مجھ سے پیار نہ کرتا تو اور کیا کرتا

کہ دشمنی میں بھی شدت اسی لگاؤ کی تھی

مگر یہ درد طلب بھی سراب ہی نکلا

وفا کی لہر بھی جذبات کے بہاؤ کی تھی

اکیلے پار اتر کر یہ ناخدا نے کہا

مسافرو یہی قسمت شکستہ ناؤ کی تھی

چراغ جاں کو کہاں تک بچا کے ہم رکھتے

ہوا بھی تیز تھی منزل بھی چل چلاؤ کی تھی

میں زندگی سے نبرد آزما رہا ہوں فرازؔ

میں جانتا تھا یہی راہ اک بچاؤ کی تھی

kashida sar se tawaqqo abas jhukao ki thi

bigar gaya hun ke surat yahi banao ki thi

wo jis ghamand se bichhra gila to us ka hai

ke sari bat mohabbat mein rakh rakhao ki thi

wo mujh se pyar na karta to aur kiya karta

ke dushmani mein bhi shiddat isi lagao ki thi

magar ye dard-e-talab bhi sarab hi nikla

wafa ki lahr bhi jazbat ke bahao ki thi

akele par utar kar ye nakhuda ne kaha

musafiro yahi qismat shikasta nao ki thi

charagh-e-jan ko kahan tak bacha ke ham rakhte

hawa bhi tez thi manzil bhi chal chillao ki thi

main zindagi se nabard azma raha hun faraz

main janta tha yahi rah ik bachao ki thi