چلے تھے یار بڑے زعم میں ہوا کی طرح

چلے تھے یار بڑے زعم میں ہوا کی طرح

پلٹ کے دیکھا تو بیٹھے ہیں نقش پا کی طرح

مجھے وفا کی طلب ہے مگر ہر اک سے نہیں

کوئی ملے مگر اس یار بے وفا کی طرح

مرے وجود کا صحرا ہے منتظر کب سے

کبھی تو آ جرس غنچہ کی صدا کی طرح

وہ اجنبی تھا تو کیوں مجھ سے پھیر کر آنکھیں

گزر گیا کسی دیرینہ آشنا کی طرح

کشاں کشاں لیے جاتی ہے جانب منزل

نفس کی ڈور بھی زنجیر بے صدا کی طرح

فرازؔ کس کے ستم کا گلا کریں کس سے

کہ بے نیاز ہوئی خلق بھی خدا کی طرح

chale the yar bare zaam mein hawa ki tarah

palat ke dekha to baithe hain naqsh-e-pa ki tarah

mujhe wafa ki talab hai magar har ik se nahin

koi mile magar us yar be wafa ki tarah

mire wajud ka sahra hai muntazir kab se

kabhi to a jaras-e-ghuncha ki sada ki tarah

wo ajnabi tha to kyun mujh se pher kar ankhen

guzar gaya kisi derina ashna ki tarah

kashan kashan liye jati hai janib-e-manzil

nafas ki dor bhi zanjir-e-be sada ki tarah

faraz kis ke sitam ka gila karen kis se

ke be niyaz hui khalq bhi khuda ki tarah