غنیم سے بھی عداوت میں حد نہیں مانگی

غنیم سے بھی عداوت میں حد نہیں مانگی

کہ ہار مان لی لیکن مدد نہیں مانگی

ہزار شکر کہ ہم اہل حرف زندہ نے

مجاوران ادب سے سند نہیں مانگی

بہت ہے لمحۂ موجود کا شرف بھی مجھے

سو اپنے فن سے بقائے ابد نہیں مانگی

قبول وہ جسے کرتا وہ التجا نہیں کی

دعا جو وہ نہ کرے مسترد نہیں مانگی

میں اپنے جامۂ صد چاک سے بہت خوش ہوں

کبھی عبا و قبائے خرد نہیں مانگی

شہید جسم سلامت اٹھائے جاتے ہیں

جبھی تو گور کنوں سے لحد نہیں مانگی

میں سر برہنہ رہا پھر بھی سر کشیدہ رہا

کبھی کلاہ سے توقیر قد نہیں مانگی

عطائے درد میں وہ بھی نہیں تھا دل کا غریب

فرازؔ میں نے بھی بخشش میں حد نہیں مانگی

ghanim se bhi adawat mein had nahin mangi

ke har man li lekin madad nahin mangi

hazar shukr ke ham ahl harf zinda ne

mujawiran-e-adab se sanad nahin mangi

bahut hai lamha-e-maujud ka sharaf bhi mujhe

so apne fan se baqa-e-abad nahin mangi

qubul wo jise karta wo iltija nahin ki

dua jo wo na kare mustarad nahin mangi

main apne jama-e-sad chak se bahut khush hun

kabhi aba-o-qaba-e-khirad nahin mangi

shahid-e-jism salamat uthae jate hain

jabhi to gor kinon se lahad nahin mangi

main sar barahna raha phir bhi sar kashida raha

kabhi kulah se tauqir qad nahin mangi

ata-e-dard mein wo bhi nahin tha dil ka gharib

faraz main ne bhi bakhshish mein had nahin mangi