تیرے توسن کو صبا باندھتے ہیں

تیرے توسن کو صبا باندھتے ہیں

ہم بھی مضموں کی ہوا باندھتے ہیں

آہ کا کس نے اثر دیکھا ہے

ہم بھی ایک اپنی ہوا باندھتے ہیں

تیری فرصت کے مقابل اے عمر

برق کو پابہ حنا باندھتے ہیں

قید ہستی سے رہائی معلوم

اشک کو بے سر و پا باندھتے ہیں

نشۂ رنگ سے ہے واشد گل

مست کب بند قبا باندھتے ہیں

غلطی ہائے مضامیں مت پوچھ

لوگ نالے کو رسا باندھتے ہیں

اہل تدبیر کی واماندگیاں

آبلوں پر بھی حنا باندھتے ہیں

سادہ پرکار ہیں خوباں غالب

ہم سے پیمان وفا باندھتے ہیں

پاؤں میں جب وہ حنا باندھتے ہیں

میرے ہاتھوں کو جدا باندھتے ہیں

حسن افسردہ دل ہا رنگیں

شوق کو پا بہ حنا باندھتے ہیں

قید میں بھی ہے اسیری آزاد

چشم زنجیر کو وا باندھتے ہیں

شیخ جی کعبے کا جانا معلوم

آپ مسجد میں گدھا باندھتے ہیں

کس کا دل زلف سے بھاگا کہ اسد

دست شانہ بہ قضا باندھتے ہیں

تیرے بیمار پہ ہیں فریادی

وہ جو کاغذ میں دوا باندھتے ہیں

tere tosun ko saba bandhte hain

ham bhi mazmun ki hawa bandhte hain

ah ka kis ne asar dekha hai

ham bhi ek apni hua bandhte hain

teri fursat ke muqabil ai umar

barq ko paba hina bandhte hain

qaid-e-hasti se rihai maalum

ashk ko be sar-o-pa bandhte hain

nasha-e-rang se hai washud-e-gul

mast kab band-e-qaba bandhte hain

ghalati ha-e-mazamin mat puchh

log nale ko rasa bandhte hain

ahl-e-tadbir ki wamandagiyan

ablon par bhi hina bandhte hain

sada parkar hain khuban ghalib

ham se paiman-e-wafa bandhte hain

paon mein jab wo hina bandhte hain

mere hathon ko juda bandhte hain

husn-e-afsurda dil ha rangin

shauq ko pa ba hina bandhte hain

qaid mein bhi hai asiri azad

chashm-e-zanjir ko wa bandhte hain

shaikh ji kaabe ka jana maalum

ap masjid mein gadha bandhte hain

kis ka dil zulf se bhaga ke asad

dast-e-shana ba qaza bandhte hain

tere bimar pe hain fariyadi

wo jo kaghaz mein dawa bandhte hain