رہا گر کوئی تا قیامت سلامت

رہا گر کوئی تا قیامت سلامت

پھر اک روز مرنا ہے حضرت سلامت

جگر کو مرے عشق خوں نابہ مشرب

لکھے ہے خداوند نعمت سلامت

علی الرغم دشمن شہید وفا ہوں

مبارک مبارک سلامت سلامت

نہیں گر سر و برگ ادراک معنی

تماشاۓ نیرنگ صورت سلامت

دو عالم کی ہستی پہ خط فنا کھینچ

دل و دست ارباب ہمت سلامت

نہیں گر بہ کام دل خستہ گردوں

جگر خائی جوش حسرت سلامت

نہ اوروں کی سنتا نہ کہتا ہوں اپنی

سر خستہ دشوار وحشت سلامت

وفور بلا ہے ہجوم وفا ہے

سلامت ملامت ملامت سلامت

نہ فکر سلامت نہ بیم ملامت

ز خود رفتگی ہائے حیرت سلامت

رہے غالب خستہ مغلوب گردوں

یہ کیا بے نیازی ہے حضرت سلامت

raha gar koi ta qayamat salamat

phir ik roz marna hai hazrat salamat

jigar ko mire ishq-e-khun naba mashrab

likhe hai khudawand-e-nemat salamat

ali alrraghm dushman shahid-e-wafa hun

mubarak mubarak salamat salamat

nahin gar sar-o-barg-e-idrak-e-maani

tamasha-e-nairang surat salamat

do alam ki hasti pe khat-e-fana khinch

dil-o-dast-e-arbab-e-himmat salamat

nahin gar ba kam-e-dil-e-khasta gardun

jigar khai-e-josh-e-hasrat salamat

na auron ki sunta na kahta hun apni

sar-e-khasta dushwar wahshat salamat

wafur-e-bala hai hujum-e-wafa hai

salamat malamat malamat salamat

na fikr salamat na bim malamat

ze khud raftagi ha-e-hairat salamat

rahe ghalib-e-khasta maghlub-e-gardun

ye kya be niyazi hai hazrat salamat