نقش ناز بت طناز بہ آغوش رقیب

نقش ناز بت طناز بہ آغوش رقیب

پاۓ طاؤس پئے خامۂ مانی مانگے

تو وہ بد خو کہ تحیر کو تماشا جانے

غم وہ افسانہ کہ آشفتہ بیانی مانگے

وہ تپ عشق تمنا ہے کہ پھر صورت شمع

شعلہ تا نبض جگر ریشہ داوانی مانگے

تشنۂ خون تماشا جو وہ پانی مانگے

آئنہ رخصت انداز روانی مانگے

رنگ نے گل سے دم عرض پریشانیٔ بزم

برگ گل ریزۂ مینا کی نشانی مانگے

زلف تحریر پریشان تقاضا ہے مگر

شانہ ساں مو بہ زباں خامۂ مانی مانگے

آمد خط سے نہ کر خندۂ شیریں کہ مباد

چشم مور آئینۂ دل نگرانی مانگے

ہوں گرفتار کمیں گاہ تغافل کہ جہاں

خواب صیاد سے پرواز گرانی مانگے

چشم پرواز و نفس خفتہ مگر ضعف امید

شہپر کاہ پئے مژدہ رسانی مانگے

وحشت شور تماشا ہے کہ جوں نکہت گل

نمک زخم جگر بال فشانی مانگے

گر ملے حضرت بیدل کا خط لوح مزار

اسد آئینۂ پرواز معانی مانگے

رنگ نے گل سے دم عرض پریشانیٔ بزم

برگ گل ریزۂ مینا کی نشانی مانگے

naqsh-e-naz-e-but-e-tannaz ba aghosh-e-raqib

pae taus piye khama-e-mani mange

to wo bad khu ke tahayyur ko tamasha jane

gham wo afsana ke ashufta bayani mange

wo tap-e-ishq tamanna hai ke phir surat shama

shola ta nabz-e-jigar resha daoani mange

tishna-e-khun-e-tamasha jo wo pani mange

aina rukhsat-e-andaz-e-rawani mange

rang ne gul se dam-e-arz-e-pareshani-e-bazm

barg-e-gul reza-e-mina ki nishani mange

zulf-e-tahrir-e-pareshan-e-taqaza hai magar

shana san mu ba zaban khama-e-mani mange

amad-e-khat se na kar khanda-e-shirin ke mubad

chashm-e-mor aina-e-dil nigrani mange

hun giraftar-e-kamin gah-e-taghaful ke jahan

khwab-e-sayyad se parwaz girani mange

chashm-e-parwaz-o-nafas khufta magar zof-e-umid

shahpar-e-kah piye muzhda rusani mange

wahshat-e-shor-e-tamasha hai ke jun nikhat-e-gul

namak-e-zakhm-e-jigar bal fishani mange

gar mile hazrat-e-bedil ka khat-e-lauh-e-mazar

asad aina-e-parwaz maani mange

rang ne gul se dam-e-arz-e-pareshani-e-bazm

barg-e-gul reza-e-mina ki nishani mange