کہتے ہو نہ دیں گے ہم دل اگر پڑا پایا

کہتے ہو نہ دیں گے ہم دل اگر پڑا پایا

دل کہاں کہ گم کیجے ہم نے مدعا پایا

عشق سے طبیعت نے زیست کا مزا پایا

درد کی دوا پائی درد بے دوا پایا

دوست دار دشمن ہے اعتماد دل معلوم

آہ بے اثر دیکھی نالہ نارسا پایا

سادگی و پرکاری بے خودی و ہشیاری

حسن کو تغافل میں جرأت آزما پایا

غنچہ پھر لگا کھلنے آج ہم نے اپنا دل

خوں کیا ہوا دیکھا گم کیا ہوا پایا

حال دل نہیں معلوم لیکن اس قدر یعنی

ہم نے بارہا ڈھونڈا تم نے بارہا پایا

شور پند ناصح نے زخم پر نمک چھڑکا

آپ سے کوئی پوچھے تم نے کیا مزا پایا

ہے کہاں تمنا کا دوسرا قدم یا رب

ہم نے دشت امکاں کو ایک نقش پا پایا

بے دماغ خجلت ہوں رشک امتحاں تا کے

ایک بیکسی تجھ کو عالم آشنا پایا

خاک بازی امید کارخانۂ طفلی

یاس کو دو عالم سے لب بہ خندہ وا پایا

کیوں نہ وحشت غالب باج خواہ تسکیں ہو

کشتۂ تغافل کو خصم خوں بہا پایا

فکر نالہ میں گویا حلقہ ہوں ز سر تا پا

عضو عضو جوں زنجیر یک دل صدا پایا

شب نظارہ پرور تھا خواب میں خیال اس کا

صبح موجۂ گل کو نقش بوریا پایا

جس قدر جگر خوں ہو کوچہ دادن گل ہے

زخم تیغ قاتل کو طرفہ دل کشا پایا

ہے مکیں کی پا داری نام صاحب خانہ

ہم سے تیرے کوچے نے نقش مدعا پایا

نے اسد جفا سائل نے ستم جنوں مائل

تجھ کو جس قدر ڈھونڈا الفت آزما پایا

kahte ho na denge ham dil agar para paya

dil kahan ke gum kije ham ne muddaa paya

ishq se tabiat ne zist ka maza paya

dard ki dawa pai dard-e-be dawa paya

dost dar-e-dushman hai etimad-e-dil maalum

ah be asar dekhi nala narasa paya

sadgi-o-parkari be khudi-o-hushyari

husn ko taghaful mein jurat azma paya

ghuncha phir laga khulne aj ham ne apna dil

khun kya hua dekha gum kya hua paya

hal-e-dil nahin maalum lekin is qadar yaani

ham ne barha dhunda tum ne barha paya

shor-e-pand-e-naseh ne zakhm par namak chhirka

ap se koi puchhe tum ne kya maza paya

hai kahan tamanna ka dusra qadam ya rab

ham ne dasht-e-imkan ko ek naqsh-e-pa paya

be dimagh-e-khajlat hun rashk-e-imtihan ta ke

ek bekasi tujh ko alam ashna paya

khak bazi-e-ummid karkhana-e-tifli

yas ko do alam se lab ba khanda wa paya

kyun na wahshat-e-ghalib baj khwah-e-taskin ho

kushta-e-taghaful ko khasm-e-khun baha paya

fikr-e-nala mein goya halqa hun ze sar ta pa

uzw uzw jun zanjir yak dil-e-sada paya

shab nazara parwar tha khwab mein khayal us ka

subh mauja-e-gul ko naqsh-e-boriya paya

jis qadar jigar khun ho kucha dadin-e-gul hai

zakhm-e-tegh-e-qatil ko turfa dil kusha paya

hai makin ki pa dari nam-e-sahab-e-khana

ham se tere kuche ne naqsh-e-muddaa paya

ne asad jafa sail ne sitam junun mail

tujh ko jis qadar dhunda ulfat azma paya