ہے بزم بتاں میں سخن آزردہ لبوں سے

ہے بزم بتاں میں سخن آزردہ لبوں سے

تنگ آئے ہیں ہم ایسے خوشامد طلبوں سے

ہے دور قدح وجہ پریشانی صہبا

یک بار لگا دو خم مے میرے لبوں سے

رندان در مے کدہ گستاخ ہیں زاہد

زنہار نہ ہونا طرف ان بے ادبوں سے

بیداد وفا دیکھ کہ جاتی رہی آخر

ہر چند مری جان کو تھا ربط لبوں سے

کیا پوچھے ہے بر خود غلطیہائے عزیزاں

خواری کو بھی اک عار ہے عالی نسبوں سے

گو تم کو رضا جوئی اغیار ہے لیکن

جاتی ہے ملاقات کب ایسے سببوں سے

مت پوچھ اسد وعدۂ کم فرصتیٔ زیست

دو دن بھی جو کاٹے تو قیامت تعبوں سے

hai bazm-e-butan mein sukhan azurda labon se

tang ae hain ham aise khushamad talbon se

hai daur-e-qadah wajh-e-pareshani-e-sahba

yak bar laga do kham-e-mai mere labon se

rindan-e-dar-e-mai kada gustakh hain zahid

zinhar na hona taraf un be adbon se

bedad-e-wafa dekh ke jati rahi akhir

har chand miri jan ko tha rabt labon se

kya puchhe hai bar khud ghalatihae azizan

khwari ko bhi ik ar hai ali nasbon se

go tum ko raza joi-e-aghyar hai lekin

jati hai mulaqat kab aise sabbon se

mat puchh asad waada-e-kam fursati-e-zist

do din bhi jo kate to qayamat taabon se