گرم فریاد رکھا شکل نہالی نے مجھے

گرم فریاد رکھا شکل نہالی نے مجھے

تب اماں ہجر میں دی برد لیالی نے مجھے

نسیہ و نقد دو عالم کی حقیقت معلوم

لے لیا مجھ سے مری ہمت عالی نے مجھے

کثرت آرائی وحدت ہے پرستاری وہم

کر دیا کافر ان اصنام خیالی نے مجھے

ہوس گل کے تصور میں بھی کھٹکا نہ رہا

عجب آرام دیا بے پر و بالی نے مجھے

زندگی میں بھی رہا ذوق فنا کا مارا

نشہ بخشا غضب اس ساغر خالی نے مجھے

بسکہ تھی فصل خزان چمنستان سخن

رنگ شہرت نہ دیا تازہ خیالی نے مجھے

جلوۂ خور سے فنا ہوتی ہے شبنم غالب

کھو دیا سطوت اسماۓ جلالی نے مجھے

garm-e-fariyad rakha shakl-e-nihali ne mujhe

tab aman hijr mein di bard-e-layali ne mujhe

nasya-o-naqd-e-do alam ki haqiqat maalum

le liya mujh se miri himmat-e-ali ne mujhe

kasrat arai-e-wahdat hai parastari-e-wahm

kar diya kafir un asnam-e-khayali ne mujhe

hawas-e-gul ke tasawwur mein bhi khatka na raha

ajab aram diya be par-o-bali ne mujhe

zindagi mein bhi raha zauq-e-fana ka mara

nasha bakhsha ghazab is saghar-e-khali ne mujhe

baske thi fasl-e-khuzzin chamanistan-e-sukhan

rang-e-shohrat na diya taza khayali ne mujhe

jalwa-e-khur se fana hoti hai shabnam ghalib

kho diya satwat-e-asma-e-jalali ne mujhe