غم نہیں ہوتا ہے آزادوں کو بیش از یک نفس

غم نہیں ہوتا ہے آزادوں کو بیش از یک نفس

برق سے کرتے ہیں روشن شمع ماتم خانہ ہم

محفلیں برہم کرے ہے گنجفہ باز خیال

ہیں ورق گردانیٔ نیرنگ یک بت خانہ ہم

باوجود یک جہاں ہنگامہ پیدائی نہیں

ہیں چراغان شبستان دل پروانہ ہم

ضعف سے ہے نے قناعت سے یہ ترک جستجو

ہیں وبال تکیہ گاۂ ہمت مردانہ ہم

دائم الحبس اس میں ہیں لاکھوں تمنائیں اسد

جانتے ہیں سینۂ پر خوں کو زنداں خانہ ہم

بسکہ ہیں بد مست بشکن بشکن مے خانہ ہم

موئے شیشہ کو سمجھتے ہیں خط پیمانہ ہم

بسکہ ہر یک موئے زلف افشاں سے ہے تار شعاع

پنجۂ خورشید کو سمجھے ہیں دست شانہ ہم

مشق از خود رفتگی سے ہیں بہ گلزار خیال

آشنا تعبیر خواب سبزۂ بیگانہ ہم

فرط بے خوابی سے ہیں شب ہاۓ ہجر یار میں

جوں زبان شمع داغ گرمی افسانہ ہم

شام غم میں سوز عشق آتش رخسار سے

پر فشان سوختن ہیں صورت پروانہ ہم

حسرت عرض تمنا یاں سے سمجھا چاہیے

دو جہاں حشر زبان خشک ہیں جوں شانہ ہم

کشتی عالم بہ طوفان تغافل دے کہ ہیں

عالم آب گداز جوہر افسانہ ہم

وحشت بے ربطی پیچ و خم ہستی نہ پوچھ

ننگ بالیدن ہیں جوں موئے سر دیوانہ ہم

gham nahin hota hai azadon ko besh az yak nafas

barq se karte hain raushan sham-e-matam khana ham

mahfilen barham kare hai ganjifa baz-e-khayal

hain waraq gardani-e-nairang-e-yak but khana ham

bawajud-e-yak jahan hangama paidai nahin

hain charaghan-e-shabistan-e-dil-e-parwana ham

zof se hai ne qanaat se ye tark-e-justuju

hain wabal-e-takiya gah-e-himmat-e-mardana ham

daim alhabs is mein hain lakhon tamannaen asad

jante hain sina-e-pur khun ko zindan khana ham

baske hain bad mast bashkan bashkan mai khana ham

mu-e-shisha ko samajhte hain khat-e-paimana ham

baske har yak mu-e-zulf afshan se hai tar-e-shua

panja-e-khurshid ko samjhe hain dast-e-shana ham

mashq-e-az khud raftagi se hain ba gulzar-e-khayal

ashna taabir khwab-e-sabza-e-begana ham

fart-e-be khwabi se hain shab ha-e-hijr-e-yar mein

jun zaban-e-shama dagh-e-garmi-e-afsana ham

sham-e-gham mein soz-e-ishq-e-atish-e-rukhsar se

par fishan-e-sokhtan hain surat-e-parwana ham

hasrat-e-arz-e-tamanna yan se samjha chahiye

do jahan hashr zaban-e-khushk hain jun shana ham

kashti-e-alam ba tufan-e-taghaful de ke hain

alam-e-ab gudaz-e-jauhar-e-afsana ham

wahshat-e-be rabati pech-o-kham hasti na puchh

nang-e-balidin hain jun mu-e-sar-e-diwana ham