ضد ہے انہیں پورا مرا ارماں نہ کریں گے

ضد ہے انہیں پورا مرا ارماں نہ کریں گے

منہ سے جو نہیں نکلی ہے اب ہاں نہ کریں گے

کیوں زلف کا بوسہ مجھے لینے نہیں دیتے

کہتے ہیں کہ واللہ پریشاں نہ کریں گے

ہے ذہن میں اک بات تمہارے متعلق

خلوت میں جو پوچھو گے تو پنہاں نہ کریں گے

واعظ تو بناتے ہیں مسلمان کو کافر

افسوس یہ کافر کو مسلماں نہ کریں گے

کیوں شکر گزاری کا مجھے شوق ہے اتنا

سنتا ہوں وہ مجھ پر کوئی احساں نہ کریں گے

دیوانہ نہ سمجھے ہمیں وہ سمجھے شرابی

اب چاک کبھی جیب و گریباں نہ کریں گے

وہ جانتے ہیں غیر مرے گھر میں ہے مہماں

آئیں گے تو مجھ پر کوئی احساں نہ کریں گے

zid hai unhen pura mira arman na karenge

munh se jo nahin nikli hai ab han na karenge

kyun zulf ka bosa mujhe lene nahin dete

kahte hain ke wallah pareshan na karenge

hai zehn mein ik bat tumhare mutaalliq

khalwat mein jo puchhoge to pinhan na karenge

waiz to banate hain musalman ko kafir

afsos ye kafir ko musalman na karenge

kyun shukr guzari ka mujhe shauq hai itna

sunta hun wo mujh par koi ehsan na karenge

diwana na samjhe hamen wo samjhe sharabi

ab chak kabhi jeb-o-gareban na karenge

wo jante hain ghair mire ghar mein hai mehman

aenge to mujh par koi ehsan na karenge