نقش فریادی ہے کس کی شوخیٔ تحریر کا

نقش فریادی ہے کس کی شوخیٔ تحریر کا

کاغذی ہے پیرہن ہر پیکر تصویر کا

کاو کاو سخت جانی ہائے تنہائی نہ پوچھ

صبح کرنا شام کا لانا ہے جوئے شیر کا

جذبۂ بے اختیار شوق دیکھا چاہیے

سینۂ شمشیر سے باہر ہے دم شمشیر کا

آگہی دام شنیدن جس قدر چاہے بچھائے

مدعا عنقا ہے اپنے عالم تقریر کا

بسکہ ہوں غالبؔ اسیری میں بھی آتش زیر پا

موئے آتش دیدہ ہے حلقہ مری زنجیر کا

آتشیں پا ہوں گداز وحشت زنداں نہ پوچھ

موئے آتش دیدہ ہے ہر حلقہ یاں زنجیر کا

شوخیٔ نیرنگ صید وحشت طاؤس ہے

دام سبزہ میں ہے پرواز چمن تسخیر کا

لذت ایجاد ناز افسون عرض ذوق قتل

نعل آتش میں ہے تیغ یار سے نخچیر کا

خشت پشت دست عجز و قالب آغوش وداع

پر ہوا ہے سیل سے پیمانہ کس تعمیر کا

وحشت خواب عدم شور تماشا ہے اسدؔ

جو مزہ جوہر نہیں آئینۂ تعبیر کا

naqsh fariyadi hai kis ki shokhi-e-tahrir ka

kaghzi hai pairahan har paikar-e-taswir ka

kao kao-e-sakht jani hae tanhai na puchh

subh karna sham ka lana hai ju-e-sher ka

jazba-e-be ikhtiyar-e-shauq dekha chahiye

sina-e-shamshir se bahar hai dam shamshir ka

agahi dam-e-shanedan jis qadar chahe bichhae

muddaa anqa hai apne alam-e-taqrir ka

baske hun ghalib asiri mein bhi atish zer-e-pa

mu-e-atish dida hai halqa miri zanjir ka

atishin pa hun gudaz-e-wahshat-e-zindan na puchh

mu-e-atish dida hai har halqa yan zanjir ka

shokhi-e-nairang-e-said-e-wahshat-e-taus hai

dam sabza mein hai parwaz-e-chaman taskhir ka

lazzat-e-ijad-e-naz afsun-e-arz-e-zauq-e-qatl

naal atish mein hai tegh-e-yar se nakhchir ka

khisht pusht-e-dast-e-ijz-o-qalib aghosh-e-wida

par hua hai sail se paimana kis taamir ka

wahshat-e-khwab-e-adam shor-e-tamasha hai asad

jo maza jauhar nahin aina-e-taabir ka