لوگ گیتوں کا نگر یاد آیا

لوگ گیتوں کا نگر یاد آیا

آج پردیس میں گھر یاد آیا

جب چلے آئے چمن زار سے ہم

التفات گل تر یاد آیا

تیری بیگانہ نگاہی سر شام

یہ ستم تا بہ سحر یاد آیا

ہم زمانے کا ستم بھول گئے

جب ترا لطف نظر یاد آیا

تو بھی مسرور تھا اس شب سر بزم

اپنے شعروں کا اثر یاد آیا

پھر ہوا درد تمنا بیدار

پھر دل‌ خاک‌ بسر یاد آیا

ہم جسے بھول چکے تھے جالبؔ

پھر وہی راہ گزر یاد آیا

log giton ka nagar yad aya

aj pardes mein ghar yad aya

jab chale ae chaman zar se ham

iltifat-e-gul-e-tar yad aya

teri begana nigahi sar-e-sham

ye sitam ta ba sahar yad aya

ham zamane ka sitam bhul gae

jab tira lutf-e-nazar yad aya

tu bhi masrur tha is shab sar-e-bazm

apne sheron ka asar yad aya

phir hua dard-e-tamanna bedar

phir dil-e-khak basar yad aya

ham jise bhul chuke the jalib

phir wahi rah guzar yad aya