بحثیں چھڑی ہوئی ہیں حیات و ممات کی

بحثیں چھڑی ہوئی ہیں حیات و ممات کی

سو بات بن گئی ہے فراقؔ ایک بات کی

ساز نوائے درد حجابات دہر میں

کتنی دکھی ہوئی ہیں رگیں کائنات کی

رکھ لی جنہوں نے کشمکش زندگی کی لاج

بے دردیاں نہ پوچھئے ان سے حیات کی

یوں فرط بے خودی سے محبت میں جان دے

تجھ کو بھی کچھ خبر نہ ہو اس واردات کی

ہے عشق اس تبسم جاں بخش کا شہید

رنگینیاں لئے ہے جو صبح حیات کی

چھیڑا ہے درد عشق نے تار رگ عدم

صورت پکڑ چلی ہیں نوائیں حیات کی

شام ابد کو جلوۂ صبح بہار دے

روداد چھیڑ زندگیٔ بے ثبات کی

اس بزم بے خودی میں وجود عدم کہاں

چلتی نہیں ہے سانس حیات و ممات کی

سو درد اک تبسم پنہاں میں بند ہیں

تصویر ہوں فراقؔ نشاط حیات کی

bahsen chhiri hui hain hayat-o-mamat ki

so bat ban gai hai firaq ek bat ki

saz-e-nawa-e-dard hijabat-e-dahr mein

kitni dukhi hui hain ragen kainat ki

rakh li jinhon ne kashmakash-e-zindagi ki laj

be dardiyan na puchhiye un se hayat ki

yun fart-e-be khudi se mohabbat mein jan de

tujh ko bhi kuchh khabar na ho is wardat ki

hai ishq is tabassum-e-jan bakhsh ka shahid

ranginiyan liye hai jo subh-e-hayat ki

chhera hai dard-e-ishq ne tar-e-rag-e-adam

surat pakar chali hain niwaen hayat ki

sham-e-abad ko jalwa-e-subh-e-bahar de

rudad chher zindagi-e-be sabat ki

is bazm-e-be khudi mein wajud-e-adam kahan

chalti nahin hai sans hayat-o-mamat ki

so dard ik tabassum-e-pinhan mein band hain

taswir hun firaq-e-nishat-e-hayat ki