رنجش ہی سہی دل ہی دکھانے کے لیے آ

رنجش ہی سہی دل ہی دکھانے کے لیے آ

آ پھر سے مجھے چھوڑ کے جانے کے لیے آ

کچھ تو مرے پندار محبت کا بھرم رکھ

تو بھی تو کبھی مجھ کو منانے کے لیے آ

پہلے سے مراسم نہ سہی پھر بھی کبھی تو

رسم و رہ دنیا ہی نبھانے کے لیے آ

کس کس کو بتائیں گے جدائی کا سبب ہم

تو مجھ سے خفا ہے تو زمانے کے لیے آ

اک عمر سے ہوں لذت گریہ سے بھی محروم

اے راحت جاں مجھ کو رلانے کے لیے آ

اب تک دل خوش فہم کو تجھ سے ہیں امیدیں

یہ آخری شمعیں بھی بجھانے کے لیے آ

ranjish hi sahi dil hi dikhane ke liye a

a phir se mujhe chhor ke jane ke liye a

kuchh to mire pindar-e-mohabbat ka bharam rakh

tu bhi to kabhi mujh ko manane ke liye a

pahle se marasim na sahi phir bhi kabhi to

rasm-o-rah duniya hi nibhane ke liye a

kis kis ko bataenge judai ka sabab ham

tu mujh se khafa hai to zamane ke liye a

ik umr se hun lazzat-e-girya se bhi mahrum

ai rahat-e-jan mujh ko rulane ke liye a

ab tak dil khush fahm ko tujh se hain ummiden

ye akhiri shamen bhi bujhane ke liye a